احنا مين ؟؟؟
،،،،،،،،،،،،،،،،،
جوّه راسي ميت سؤال
وألف حيرة
وسيل قلق
نفسي أعرف لو إجابة
تطفّي صدري اللي انحرق
احنا مين ؟؟؟؟
احنا فعلاً مسلمين ؟
ولاّ احنا مسخ تاني للبشر
متلونين ؟
مش بلاقي في وش طيبة
أو مشاعر
أو حنين ؟
القلوب معجونة قسوة
والنفوس متفرعنين
والكلام الصافي طالع
من حشايا مسطولين
والأكادة الناس تشوفها
تفتكرها مسلمين
بس يا خسارة الديانة
مش بيحفظها أمين
الزمن صابغ ملامح
للعجز جوّه العينين
كل واحد فينا فاكر
إنه روح للصالحين
إنما جوّه ف طباعه
ألف مِلّه وألف دين
أحنا مين ؟؟؟
احنا فعلاً مسلمين ؟؟؟
طب سلوكنا ليه مافيهش
أي حاجه من الأمين ؟
إختفت منا الأمانة
والشهامة
والطريق المستقيم ؟
ليه ما بينّا الصدق ضايع
والصديق مبقاش حميم ؟
والطباع الحلوة راحت
ويّا أفراح السنين
إحنا فعلاً لسّه أمّة
ولاّ صرنا وحل طين ؟
لسّه فينا قلب صالح
أو ما زال جوّانا دين ؟
ولاّ أصبحنا عرايس
جوّه منها شياطين ؟
والله أنا قلبي حزين
كنت فاكر ف الشدايد الإيدين متمسكين
كنت فاكر الديابة هي بس الجبارين
إنما بقى جوّه نفسي فيه مخاوف م الطيبين
اللي يسكت عن حقوقه يبقى ايه ؟
اللي يترك ناس تبيعه وتشتريه ؟
اللي يرضى بدمع يسكن في عينيه ؟
اللي يرضى الخوف يجيله
وحش يتهجّم عليه ؟
اللي يتلخبط في ضِلّه
وميلاقيش حد يلاقيه ؟
اللي شايف زرع أخضر ينقلع
ولا رحمة ليه ؟
اللي فاهم فيكوا ينطق
كل دول بقى يبقوا مين ؟
الشتا فاردة الأساوة ع الغلابة المطحونين
والغلا حارم غلابة يوم يناموا شبعانين
والمظالم شوف أنينها جوّه صدر المظلومين
كل ده والناس بتضحك
زي حال المسحورين
فين يكون عدل الفاروق
ولاّ سيف صلاح الدين
يا بشر متعذّبين
فوقوا مرّه وحد ينطق
أو يقول لي
احنا مين ؟؟؟؟
بقلمي / إبراهيم فهمي المحامي
15/1/2019
ليست هناك تعليقات:
اضافة تعليق